ಯುದ್ಧಭೂಮಿಯಲ್ಲಿ AI ಮಹಾಶಕ್ತಿ! ಇರಾನ್ ಮೇಲಿನ ದಾಳಿಯಲ್ಲಿ ʻClaudeʼ ಹೇಗೆ ಕೆಲಸ ಮಾಡಿತು?

2025ರಲ್ಲಿ ಎಐ ಸಹಾಯದಿಂದ ದಾಳಿ

2025ರಲ್ಲಿ ಇರಾನ್ ವಾಯುಪ್ರದೇಶಕ್ಕೆ ನುಗ್ಗಿದ ಇಸ್ರೇಲ್‌ನ ಒಂದು ಯುದ್ಧ ವಿಮಾನ ಅಣು ಸ್ಥಾವರಗಳನ್ನು ಗುರಿಯಾಗಿಸಿಕೊಂಡು ದಾಳಿ ನಡೆಸಿತ್ತು. ಈ ದಾಳಿಯ ಸಮಯ ಮತ್ತು ಗುರಿಯನ್ನು ನಿರ್ಧರಿಸಿದ್ದು ಪೈಲಟ್ ಅಲ್ಲ ಎಂಬುದು ಗಮನಾರ್ಹ.

ಆ ಕೆಲಸವನ್ನು ಎಐ ವ್ಯವಸ್ಥೆಯೇ ಮಾಡಿತ್ತು. ಕಂಪ್ಯೂಟರ್ ವ್ಯವಸ್ಥೆ ಗುಪ್ತಚರ ಮಾಹಿತಿಯನ್ನು ವಿಶ್ಲೇಷಿಸಿ ಯಾವ ಸ್ಥಳವನ್ನು ಗುರಿಯಾಗಿಸಬೇಕು ಎಂದು ತೀರ್ಮಾನಿಸಿತು. ಅದರ ಆಧಾರದ ಮೇಲೆ ದಾಳಿ ನಡೆಯಿತು. ಇದರಿಂದ ಯುದ್ಧದಲ್ಲಿ ಎಐ ತಂತ್ರಜ್ಞಾನ ಎಷ್ಟು ಪ್ರಮುಖವಾಗಿದೆ ಎಂಬುದು ಸ್ಪಷ್ಟವಾಗುತ್ತದೆ.

ರಣರಂಗದಲ್ಲಿ ಎಐ ಮಹಾ ಅಸ್ತ್ರ

ಮಿಲಿಟರಿ ಕ್ಷೇತ್ರದಲ್ಲಿ ಎಐ ಬಳಕೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ವಿಶೇಷವಾಗಿ ಅಮೆರಿಕ ಸೇನೆ ಎಐ ತಂತ್ರಜ್ಞಾನ ಅಭಿವೃದ್ಧಿಗೆ ಭಾರೀ ಹೂಡಿಕೆ ಮಾಡುತ್ತಿದೆ. ಕಳೆದ ಎರಡು ವರ್ಷಗಳಲ್ಲಿ ಮಾತ್ರ ಎಐ ಅಭಿವೃದ್ಧಿಗೆ ಕೋಟ್ಯಂತರ ರೂಪಾಯಿ ಖರ್ಚು ಮಾಡಲಾಗಿದೆ.

ಇದರ ಜೊತೆಗೆ ಎಐ ಮೂಲಸೌಕರ್ಯ ಅಭಿವೃದ್ಧಿಗೆ ಲಕ್ಷಾಂತರ ಕೋಟಿ ರೂಪಾಯಿ ವೆಚ್ಚದ ಯೋಜನೆ ಘೋಷಿಸಲಾಗಿದೆ. ಶಕ್ತಿಶಾಲಿ AI ಆಧಾರಿತ ಸೇನೆ ನಿರ್ಮಿಸಲು ವಿಶ್ವದ ಹಲವು ರಾಷ್ಟ್ರಗಳು ಪ್ರಯತ್ನಿಸುತ್ತಿವೆ.

24 ಗಂಟೆಗಳಲ್ಲಿ 1000 ಗುರಿಗಳು

ಫೆಬ್ರವರಿ 28ರಂದು ಅಮೆರಿಕ ಮತ್ತು ಇಸ್ರೇಲ್ ಸೇರಿ ಇರಾನ್ ಮೇಲೆ ಭಾರೀ ವೈಮಾನಿಕ ದಾಳಿ ನಡೆಸಿದ ಘಟನೆ ವಿಶ್ವದ ಗಮನ ಸೆಳೆದಿತ್ತು. ಕೇವಲ 24 ಗಂಟೆಗಳಲ್ಲಿ ಸುಮಾರು 1,000 ಗುರಿಗಳ ಮೇಲೆ ದಾಳಿ ನಡೆಸಲಾಗಿದೆ ಎಂದು ವರದಿಗಳು ಹೇಳಿವೆ.

ಇರಾನ್ ರಾಜಧಾನಿ ಟೆಹ್ರಾನ್ ಸೇರಿದಂತೆ ಹಲವು ಪ್ರಮುಖ ನಗರಗಳ ಮೇಲೆ ಬಾಂಬ್ ದಾಳಿ ನಡೆದಿತ್ತು. ಒಂದೇ ದಿನದಲ್ಲಿ ಇಷ್ಟು ಗುರಿಗಳನ್ನು ಗುರುತಿಸಿ ದಾಳಿ ನಡೆಸುವುದು ಮಾನವರಿಂದ ಸಾಧ್ಯವಾಗುವುದು ಬಹಳ ಕಷ್ಟ. ಆದರೆ ಎಐ ಬಳಕೆಯಿಂದ ಈ ಪ್ರಕ್ರಿಯೆ ಬಹಳ ವೇಗವಾಗಿ ನಡೆಯಿತು.

ʻClaudeʼ ಎಐ ಹೇಗೆ ಸಹಾಯ ಮಾಡಿತು?

ಈ ದಾಳಿಯ ಯೋಜನೆ ರೂಪಿಸುವಲ್ಲಿ ‘Claude’ ಎಂಬ ಎಐ ತಂತ್ರಜ್ಞಾನ ಬಳಸಲಾಗಿದೆ ಎಂದು ಹೇಳಲಾಗುತ್ತಿದೆ. ಇದು ಗುಪ್ತಚರ ವರದಿಗಳಲ್ಲಿರುವ ಮಾಹಿತಿಯನ್ನು ವಿಶ್ಲೇಷಿಸಿ ಯಾವ ಗುರಿಗಳನ್ನು ಮೊದಲು ದಾಳಿ ಮಾಡಬೇಕು ಎಂಬುದನ್ನು ನಿರ್ಧರಿಸಿತು.

ಈ ತಂತ್ರಜ್ಞಾನವನ್ನು ಅಮೆರಿಕದ ಸೇನೆ ಬಳಸಿದುದರಿಂದ ದಾಳಿಯ ಯೋಜನೆ ಬಹಳ ವೇಗವಾಗಿ ರೂಪಿಸಲು ಸಾಧ್ಯವಾಯಿತು. ಆಸಕ್ತಿಕರ ವಿಷಯವೆಂದರೆ, ಇದೇ ರೀತಿಯ ಎಐ ತಂತ್ರಜ್ಞಾನಗಳನ್ನು ಸಾಮಾನ್ಯ ಜನರು ದಿನನಿತ್ಯದ ಕೆಲಸಗಳಿಗೂ ಬಳಸುತ್ತಿದ್ದಾರೆ.

ಇಸ್ರೇಲ್‌ನ ‘Lavender’ ಎಐ

ಇದಕ್ಕು ಜೊತೆಗೆ ಇಸ್ರೇಲ್ ತನ್ನದೇ ಆದ ‘Lavender’ ಎಂಬ ಎಐ ವ್ಯವಸ್ಥೆಯನ್ನು ಬಳಸುತ್ತಿದೆ. ಈ ತಂತ್ರಜ್ಞಾನವು ಜನರ ಆನ್‌ಲೈನ್ ಚಟುವಟಿಕೆಗಳು ಮತ್ತು ವರ್ತನೆಗಳನ್ನು ವಿಶ್ಲೇಷಿಸಿ ಅವರು ಸೈನಿಕ ಗುರಿಗಳಾಗುವ ಸಾಧ್ಯತೆ ಇರುವವರೇ ಅಥವಾ ಇಲ್ಲವೇ ಎಂದು ಗುರುತಿಸುತ್ತದೆ.

ಈ ಮಾಹಿತಿ ಆಧರಿಸಿ ದಾಳಿ ನಡೆಸಬೇಕಾದ ಗುರಿಗಳ ಪಟ್ಟಿಯನ್ನು ವೇಗವಾಗಿ ಸಿದ್ಧಪಡಿಸಲಾಗುತ್ತದೆ. ಇದರಿಂದ ಯುದ್ಧ ಕಾರ್ಯಾಚರಣೆ ಇನ್ನಷ್ಟು ವೇಗವಾಗಿ ನಡೆಯುತ್ತದೆ.

ರಷ್ಯಾ–ಉಕ್ರೇನ್ ಯುದ್ಧದಲ್ಲಿ ಎಐ ಬಳಕೆ

ಯುದ್ಧದಲ್ಲಿ ಎಐ ಬಳಕೆ ದೊಡ್ಡ ಮಟ್ಟದಲ್ಲಿ ಮೊದಲಿಗೆ ಗಮನಸೆಳೆದದ್ದು ರಷ್ಯಾ–ಉಕ್ರೇನ್ ಯುದ್ಧದ ವೇಳೆ. ಈ ಯುದ್ಧದಲ್ಲಿ ಡ್ರೋನ್ ದಾಳಿಗಳ ನಿಖರತೆಯನ್ನು ಹೆಚ್ಚಿಸಲು ಎಐ ತಂತ್ರಜ್ಞಾನವನ್ನು ಬಳಸಲಾಗಿದೆ.

ಎಐ ಬಳಕೆಗೆ ಮುನ್ನ ಡ್ರೋನ್ ದಾಳಿಗಳ ಯಶಸ್ಸಿನ ಪ್ರಮಾಣ ಸುಮಾರು 30 ರಿಂದ 50 ಶೇಕಡಾ ಮಾತ್ರವಾಗಿತ್ತು. ಆದರೆ ಎಐ ಬಳಕೆಯ ನಂತರ ಅದು ಸುಮಾರು 80 ಶೇಕಡಾ ನಿಖರತೆಯವರೆಗೆ ಹೆಚ್ಚಾಗಿದೆ ಎಂದು ಹೇಳಲಾಗುತ್ತದೆ.

ಉಕ್ರೇನ್ ಅಭಿವೃದ್ಧಿಪಡಿಸಿದ ‘Delta’ ಎನ್ನುವ ಎಐ ವ್ಯವಸ್ಥೆ ಉಪಗ್ರಹಗಳು, ಸೆನ್ಸಾರ್‌ಗಳು, ಡ್ರೋನ್‌ಗಳು ಮತ್ತು ಸಾಮಾಜಿಕ ಮಾಧ್ಯಮಗಳಿಂದ ಮಾಹಿತಿಯನ್ನು ಸಂಗ್ರಹಿಸಿ ಕೆಲವೇ ನಿಮಿಷಗಳಲ್ಲಿ ಸೇನೆಗೆ ಒದಗಿಸುತ್ತದೆ. ಇದರಿಂದ ನೂರಾರು ಜನರು ಮಾಡುವ ಕೆಲಸವನ್ನು ಸಾಫ್ಟ್‌ವೇರ್ ಕ್ಷಣಗಳಲ್ಲಿ ಮಾಡುತ್ತದೆ.

ಯುದ್ಧದ ಭವಿಷ್ಯ ಎಐ ಕೈಯಲ್ಲಿ?

ಈ ಎಲ್ಲ ಬೆಳವಣಿಗೆಗಳನ್ನು ಗಮನಿಸಿದರೆ ಮುಂದಿನ ದಿನಗಳಲ್ಲಿ ರಕ್ಷಣಾ ವ್ಯವಸ್ಥೆಯಲ್ಲಿ ಎಐ ಅತ್ಯಂತ ಪ್ರಮುಖ ಪಾತ್ರ ವಹಿಸುವ ಸಾಧ್ಯತೆ ಇದೆ. ಕೇವಲ ಆಯುಧಗಳು ಮಾತ್ರವಲ್ಲದೆ, ಮಾಹಿತಿ ವಿಶ್ಲೇಷಣೆ ಮತ್ತು ತಂತ್ರ ರೂಪಿಸುವುದಲ್ಲಿಯೂ ಎಐ ಪ್ರಮುಖವಾಗುತ್ತಿದೆ.

ಅದರ ಕಾರಣದಿಂದಲೇ ಭವಿಷ್ಯದ ಯುದ್ಧಗಳಲ್ಲಿ ಎಐ ತಂತ್ರಜ್ಞಾನವೇ ನಿರ್ಣಾಯಕ ಶಕ್ತಿಯಾಗುವ ಸಾಧ್ಯತೆ ಇದೆ ಎಂದು ರಕ್ಷಣಾ ತಜ್ಞರು ಅಭಿಪ್ರಾಯ ವ್ಯಕ್ತಪಡಿಸುತ್ತಿದ್ದಾರ.